Manipur Legislative Assembly inthlan zo fel ta

Manipur Legislative Assembly inthlan chu Inrinni liam ta khan zawhfel a ni ta. Vote tlate hi March 10-ah chhiarin result puan a ni ang.

Inrinnia inthlan thawh hnihna, assembly bial 60 zinga 22-a neihah hian vote 76.6% a tla a, inthlan kaihhnawiha buaina chhuakah mi pahnih an thi a, hliam tuar eng emaw zat an awm bawk.

February 28-ah inthlan thawh khatna, assembly constituency 38-a neihah khan vote 88.63% a tla a ni.

Police-te chuan vote thlak nia Karong, Senapati district-a poling station aṭanga EVM lakchhuah tumte silaia an kahnaah mi pakhat a thi a, Thoubal district-ah party pahnih worker-te intihbuainaah BJP activist pakhat chu kahhlum a ni, mi ṭhenkhatin hliam an tuar bawk niin an sawi. Mao, Moreh leh hmun dang ṭhenkhatah political party worker-te inkarah intihbuaina a thleng bawk a ni.

Manipur chief electoral officer (CEO) Rajesh Agrawal chuan hill district-a hmun 12-ah misual ṭhenkhatin EVM an tihchhiat thu sawiin, FIR pawh thehluh nghal a ni tih a sawi.

Inthlan thawh hnihna duty tur hian central paramilitary force sipai 20,000 chuang dah an ni.

Congress-in Spureme Court-ah EC khing dawn
Congress party chuan Manipur-a BJP kaihhruai sorkarin helpawl hnena fund a pek, Election Commission of India (ECI)-in Model Code of Conduct bawhchhiatna a ni lo tih a sawi chungchang chu Supreme Court-ah khin an tum.

BJP sorkar hian kumin February 1 leh March 1 khan sorkar nena inkahhai puang mek, helpawlte nena fund tam tham tak a pechhuak a ni. Congress party chuan heng fund hi hun rei tak pekchhuah a nih tawh loh hnuah, inthlan neih tur thlir hian pekchhuah niin an sawi. Hemi hnu hian Kuki helpawl chuan BJP an thlawp thu leh, an candidate-te vote tura mipui an chahna thuchhuahte pawh an siam zui a ni, an ti.

Party senior leader Jairam Ramesh chuan ECI-in helpawl hnena fund pek hian MoC a kalh lo tia thutlukna a siam chu mak a ti hle tih sawiin, Supreme Court-ah zualko ngei a tum tih a sawi. Manipur-a Model Code of Conduct hman a nih hnuah, BJP sorkar hian February 1 khan Rs vbc 15.7 leh March 1 khan Rs nuai 92.65 chu inkahhai puang mek helpawlte hnenah a pek a ni, tiin a sawi.