Sikkim sorkarin nu, hnathawh nei lo te Rs 20,000 ṭheuh a pe dawn

Sikkim sorkar chuan nu, hnathawh nei lo te Rs 20,000 ṭheuh a pe dawn a, Class 9 leh a chunglama zirlai hmeichhiate chu a thlawnin sanitary napkin a pe dawn bawk tih chief minister PS Tamang chuan a sawi.

Chief Minister chuan state sorkarin non-working mother-te tan 'Aama Yojna' leh zirlai hmeichhiate tan Bahini scheme a kalpui tur thu hi kar liam ta Zirtawpni khan Melli-a inkhawm buatsaihah a sawi a ni.

Aama Yojana hnuaiah hian non-working mother-te chu kumtin an bank account-ah Rs 20,000 hi thunsak an ni ang. Mahse he hamṭhatna dawng turte chu state electoral roll-a an hming chuang ngeite an ni tur a ni, tiin CM chuan a sawi. He scheme hi kumin aṭangin hman ṭan a ni dawn a, kalpui anih thuai theihna turin a ṭul angte buaipui mek a ni, a ti. He scheme atan hian budget-ah Rs vbc 100 dah a nih thu a sawi bawk.

Bahini scheme hmangin state chhunga Class 9 leh a chunglama zirlai hmeichhia, mi 18,000 chuang chu sanitary napkin sem an ni dawn bawk. State sorkar chuan school-ah sanitary napkin vending machine dah tumin ruahmanna a siam bawk a, menstrual health and hygience chungchangah inzirtirna tam zawk neih a tum bawk a ni.