Nagaland CM-in Shamator district thar hawng

Nagaland chief minister Neiphiu Rio chuan Zirtawpni liam ta khan official-in Shamator district thar a hawng ta.

Chief Minister-in 'brotherhood district' tia a sawi, Shamator hi kumin January thla khan state cabinet meeting-in a remtih hnuah district tharah puan a lo ni tawh a, Nagaland-a district 16-na a ni. 2011 census-ah khan Shamator district-ah hian mi 34,223 an awm a, literacy rate hi 68.79% a ni

District thar hawnna inkhawma mipui kalkhawmte hnenah, CM Rio chuan inlungrual taka awm a, hma sawn tura ṭan la turin a chah. District hmasawnna tur hian inkalpawhna kawngpui tha chu ngaih pawimawh hmasak a nih thu sawiin, Trans-National Highway siam rawtna pawh sorkar laipuiah thehluh a ni tawh a ni, a ti. Mipuite chu ram chungchangah buaina siam lo a, sorkarin hmasawnna hna a thawh theihna tura ram pawh pe zawk turin a ngen.