Tinsukia tualthah thubuai: SP sawn, eptu lamin chhuichian phut

Assam-a Tinsukia district-a Bengali panga thah an nih aṭanga ni li liam hnu, Thawhṭanni khan Assam sorkar chuan Sadiya police district SP Prasanta Sagar Changmai chu a sawnchhuak.

Hemi hnu lawk hian eptu party Congress hruaitu Debabrata Saikia chuan tualthahna hi uluk taka chhuichian a phut thu a sawi.

Home Department official chuan Prasanta Sagar Changmai, Superintendent of Police, Sadiya chu sawn a nih thu sawiin Baksa-a Charaimari-a 24th AP(IR)Bn Commandant, Debojit Deuri nen an post an inthleng dawn thu a sawi a ni.

Hetihlai hian Congress hruaitu Saikia chuan tualthahna thleng kha dan ang taka chhui an phut thu a sawi a, Bharatiya Janata Party kaihhruai sorkar chuan vote zawnna atan mipui rilru an hruai khawlo niin a sawi bawk.

Saikia chuan mi zawng zawngin tualthahna thleng kha an bengkhawn tih sawiin heti chung hian sorkar chuan a beng a chhu ngawng lui tlat a, ngawi rengin a thlir lui tlat a ni, a ti. Mitthi chhungte hi tlawh chhuak vekin sorkar chuan state chhunga society hrang hrang chu a venghlim tur a ni tiin a sawi a ni.

Congress hruaitu chuan BJP sorkar chu hma la ṭha duh loah puhin an party hruaitu ṭhenkhat chuan he tualthahna kawngah hian thu ṭha lo tak tak an chhakchhuak chung pawha hremna an lekkawh duh loh laiin hetiang vang tho hian ULFA hruaitu pahnih chu an man thung si niin a sawi.

Kar liamta Ningani zanah khan hel ni ngeia hriat te chuan Tinsukia-a Bengali mi panga chu hruaichhuakin a hnu lawkah heng an mi hruaichhuahte ruang hi lei bulah hmuh an ni a, kahhlum an nih thu tarlan a lo ni tawh a ni.

Assam Chief Minister Sar­banada Sonowal leh Union Home Minister Rajnath Singh te chuan pawikhawihna hi an dem thu an lo sawi tawh a, he thubuai kaihhnawihah hian ULFA mi pahnih chu kar hmasa zirtawpni khan man an ni tawh.

He tualthahna hi ULFA tih ni ngeia hriat ni mah se ULFA lam hian an pha thung a ni.