KNP-a forest ranger kut an thlak vangin Assam MLA hlui 2-te kum 2 tang turin hrem

Assam-a Golaghat district-a local court chuan kar liam ta Inrinni khan state MLA hlui pahnih leh midang pahtumte chu kum 10 chuang liam taa Kaziranga National Park chhunga forest ranger pakhat kut an thlak avangin kum hnih jail tang turin a hrem.

Additional district judge Kaushik Hazarika chuan MLA hlui pahnih, Jiten Gogoi leh Kushal Dowari-te chu Rs 5,000 ve ve chawi turin a ti bawk. An sum chawi tur hi an pe lo a nih chuan an tan hun hi thla hnih dang pawhsei sak an ni ang.

MLA hlui pahnih leh midang pathumte hi Wildlife (Protection) Act hnuaiah hrem an ni.

Gogoi leh Dowari-te hi kum 2009-a he thil thlen lai hian independent MLA an ni. Kum 2009, March 17 khan MLA hlui pahnihte hi an ṭhiante nen national park chhungah hian phalna nei loin sangha man tumin restricted area-ah an kal a ni. Forest ranger Dharanidhar Boro-a'n a lo dan chuan AK-47 rifle nen vauin kut an thlak zui ta a, Kohara-a forest range office chu an tichhe bawk.

Forest ranger hian police-ah complaint a thehlut a, Wildlife (Protection) Act hnuaiah MLA hlui pahnih leh an thurualpuite hi thubuai siamsak an ni. Thubuai ziahluh a nih aṭanga kum 12 liam hnuah court chuan thiam loh chantirin, hremna tur hi a tichhuak ta a ni.