ASSU in Citizenship Bill 2016 duh lohna an lantir

Assam-a zirlai pawl lian ber All Assam Students’ Union (AASU) leh pawl dang 28-te chuan Ningani khan Dispur-ah Citizenship (Amendment) Bill 2016 duh lohna an lantir.

Sorkar in Assam leh hmar­chhak hmun danga Citizenship (Amendment) Bill 2016 kalpui a tum duh lohna lantirna kawng­zawh hi Ningani khan neih niin Ganeshguri aṭanga Dispur thleng kawngzawh a ni a, Citizenship bill hi Assam leh hmarchhak state tana thil hlauhawm tak nia ngaiin mi tam takin kawng hi an zawh a ni.

He hunah hian AASU adviser Samujjal Bhattacharyya chuan thu sawiin Ningani-a duh lohna an lantirna chu invauna a nih thu sawiin Chief Minister Sarbananda Sonowal kaihhruai Assam sorkar chuan Bill chu an do tur a ni, a ti. Sorkar in Bill hi a kaltlangpui lui a nih chuan Dispur chu an zuah dawn lo nia sawiin a vau.

BJP chuan danglamna thlen tiamin thuneihna an chang a, mahse kum hnih chhung pawhin engmah danglamna a awm chuang lo tih sawiin, dan loa Bangladesh mi ramchhunga awm te chu an chhuak tur a nih laiin an la chhuak lo tih a sawi. Ram leilung fate chu venhim an ni tur a ni tia sawiin engmah venhimna an dawng chuang lo niin a sawi.

AASU President Dipank Kumar Nath chuan Citizenship (Amendment) Bill, 2016; the Fo­reigners (Amendment) Order, 2015; the Passport (Entry into India) Amendment Rules, 2015 leh Bangladesh, Pakistan leh Afghanis­tan mipute tana long term visa pek tura ruahmanna awm te chu an dodal zel dawn tih a sawi ve bawk.

Dipank Kumar Nath chuan sorkar laipui chuan Assam Accord bawhchhiaa Citizenship Act hman an tum tih sawiin, hetiang thil hi an thlentir dawn lo niin a sawi a, sorkar laipuiin Citizenship Amendment Bill, 2016 an sut leh hma chu an dodal zel dawn tih a sawi bawk a ni.