Diwali hnuah Assam boruak bawlhhlawh zual

Kar liamta Nilaini-a Diwali hman zawh hnu khan Assam boruak chu a bawlhhlawh zual zel a, Assam khawpui Guwahati-ah chuan boruak bawlhhlawh zawng chuan hlauhawm chin a thleng.

Khawpui boruak bawlhhlawh zawng hian 240 micrograms thlengin hei hi boruak an dawnṭhin aiin a let liin a bawlhhlawh a ni.

Nilaini leh Ningani khan As­sam hmun hrang hrangah Supreme Court-in phalna a pek chin pelhah pawh halpuah leh halmawi hal an la tam hle a, ruah a sur bawk si loh avangin boruak bawlhhlawh hi a zual nasa hle niin mithiamte chuan an sawi.

Pollution Control Board of Assam (PCBA) chuan ri beng­chheng erawh kum hmasa lam ai chuan a zia zawk tih an sawi laiin boruak bawlhhlawh zawng erawh nasa takin a pung tih an sawi a, ambient air quality monitoring an tih­chhuahah Diwali lai khan boruak bawlhhlawh hi nasa takin a pung tih an sawi bawk.

PCBA Environmental scientist Manoj Saikia chuan Diwali lai khan boruak bawlhhlawh zawng chu 60 micrograms per meter cube aṭangin 240 microgram-ah a invawrh dawrh tih sawiin hei hi boruak pangngai aiin a let liin a tam tawh a sawi.

World Health Organisation (WHO) chuan 10 micrograms per meter cube hi hrisel tawka a ngaih a ni thung.

PCBA chuan kumina heti taka boruak a bawlhhlawh zual chhan hi phuljhari, charki leh halpuah/halmawi dang an hman nasat zual vang tih an sawi.

Scientist chuan halpuah hal an khap chuan bengchheng chu kumdang aiin a tinep niin a sawi a, mahse halzit leh halmawi dang nasa zawka an hal thung avangin boruak a bawlhhlawh zual niin a sawi a ni.

Medical practitioner chuan ruah a sur loh avangin khu a tam phah hle tih a sawi a, hei hi mihring leh ramsa te tan pawh a hlauhawm tih a sawi.

Bengchheng tehnaah chuan nikum Diwali-ah khan khawpui area-ah hian 79 decibles vel a nih laiin kuminah erawh 76 decibels vel a ni thung a ni.