Manipur in 2020-ah sangha tharchhuak hnem dawn: Fisheries Minister

Manipur Fisheries Minister N. Kayisii chuan sangha khawi lamah nasa taka hma an lak chhunzawm zel dawn thu sawiin 2020-ah chuan sangha tam tak state pawnah an thawnchhuak dawn tih a sawi.

Fisheries Minister N. Kayisii hi kar hmasa Ningani-a Thangmeiband, Imphal-a DM College of Arts-a Fish Fair-cum- Fish Crop Competition 2018-ah chief guest atan hman a ni.

Manipur-ah hian kum khata sangha an mamawh zat hi metric tonne 52,000 a nih laiin an state hian metric tonne 32,000 chiah tun dinhmunah hian an tharchhuak a, a bak zawng hi chu state pawn lam aṭangin an lalut thung.

Minister Kayisii chuan sangha khawi chu eizawnna atana thil ṭha tak a nih thu sawiin mipuite chu intihhmuh turin a fuih nghal bawk a ni.

Fish Fair-cum- Fish Crop Com­pe­tition 2018-ah hian sangha khawitu tam tak an tel a, sangha kg. 90,000 vel zawrh niin district hrang hrang aṭang­in sangha dawr 90 vel hawn a ni a, Fisheries Department pawhin an sangha tharchhuah te an phochhuak ve bawk. ICAR, CAU leh College of Fisheries-te pawhin dawr an hawng ve nghe nghe.

All Manipur Fish Farming Society Association general secretary Amom Tiken chuan sangha khawitute chuan kumina tuilen nasat avang khan kum thum tal chu harsatna an tawh thu a sawi ve bawk a ni.