AASU in Citizenship (Amendment) Bill dodal leh

Assam hmun hrang hrangah Inrinni khan AASU-ten Citizenship (Amendment) Bill, 2016 duh lohna an lantir.

Sivasagar district unit All Assam Students’ Union (AASU)-te chuan Sivasagar-a Deputy Commissioner office kawtah Bharatiya Janata Party (BJP) kaihhruai sorkar in Citizenship (Amendment) Bill 2016 kalpui a tum duh lohna lantirna an nei.

AASU-te hian Citizenship (Amendment) Bill 2016 kalpui lo tur leh hnukdawk tura sorkar an duh thu an aupui a, Assam Accord zulzuia Assam ram leilung fate venhim leh Assam Accord kalpui leh India-Bangladesh border tihphui an duh thu te an tarlang a ni.

DC office kawta nawrh huaihawtte hian kawng zawhin Boarding field aṭnga DC office kawt thleng hi kawng an zawh a, Citizenship Amendment bill an duh loh thu te, Bangladesh Hindu te an rama kire leh tura an duh thu te leh BJP sorkar am duh loh thu te an auchhuah pui bawk.

AASU hruaitu Manik Gogoi chuan thu sawiin Sarbanada Sonowal kaihhruai BJP sorkar chuan kalphung thlak danglam tiamin sorkarna an siam thu a sawi a, mahse kum hnih chhungin engmah inthlak danglam a la awm lo a ni, a ti.

Dan loa Bangladesh mi state chhunga awm te chu chhuak tur an nih thu sawiin tun thlengin an la chhuak lo tih a sawi a, ram leilung fate chuan venhimna an dawng tur a nih laiin chumi kawngah pawh chuan engmah hmasawnna a awm lo tih a sawi bawk.

Inrinni-a kawngzawhnaah hian ASSU hi pawl dang 28 in an thlawp a, mi 1000 vel an tel nia tarlan a ni.

Golaghat AASU-te pawhin pawl dang 28 thlawpnain Inrinni vek khan Citizenship (Amendment) Bill, 2016 duh lohna kawngzawh hi an nei ve bawk.

Golaghat AASU office kawt aṭanga kawngzawh ṭanin bazar hmunah an pungkhawm a ni. He hunah hian AASU bakah hian All Bodo Students’ Union, District Sahitya Sabha, Muslim Kalyan Parishad leh Golaghat-a mi langsar tak tak te pawh an tel.

Morigaon unit AASU-te pawhin pawl dang pakua thlawpna in Citizenship Bill dodalna hi an lantir ve bawk a, mi 500 vel an tel nia tarlan a ni bawk.

Lakhimpur district-ah pawh pawl 28 dangte thlawpna in bill duh lohna hi an lantir a, Lakhimpur unit AASU hruaitute chuan he bill chungchanga Chief Minister Sarnanada Sonowal a ngawi tlat chu mak an tih thu sawiin an sawisel a ni.

He hunah hian Lakhimpur district AASU president Pulok Jyoti Borah leh secretary Dhan­moni Dutta-te chuan a tawp thlenga Bill dodal tur hian thu an tiam nghe nghe a ni.

Assam-ah hian AASU-te kaihhruaina hnuaiah hian Citizenship Bill hi an dodal fo tawh a, he bill hnuaiah hian Bangladesh, Afghanistan leh Pakistan mi, India rama awm te chu India khua leh tui nihna pek an ni thei dawn a ni. Hei hi ram leilung fate chimralna tur nia ngaiin Assam mipui tam tak chuan an duh lo hle a ni.