Sikkim-a Indigenous tribal pawl ten NRC leh ILP ngiat

Sikkim-a Indigenous tribal pawl hrang hrang te chuan an state chhunga National Register of Citizens (NRC) leh Inner Line Permits (ILP) hman ve an ngiat.

Sikkim Indigenous Lepcha Tribal Association (SILTA) general secretary Tashi Lhamu Lepcha chuan state chhunga dan loa mi tam tak luh loh nan leh dan loa lut mek thununna turin NRC kalpui ve a ṭul thu a sawi.

Sikkim Bhutia Lep­cha Apex Committee (SIBLA) convener Tseten Tashi Bhutia pawhin Sikkim chu dan loa ramdang mi pemluhna a nih thu sawiin NRC kalpui a hun tawh thu a sawi ve bawk.

Hetihlai hian state sorkar chuan ILP kalpui leh NRC hmang ve tura thutlukna a la siam rih loh thu an sawi thung.

Special Secretary (Home) Pratap Pradhan chuan Sikkim-a pawl hrang hrangin ILP an ngiat ve thu a sawi a, mahse sorkar chuan hemi chungchangah hian thutlukna an la siam lo niin a sawi. Assam-a NRC kalpui a nih hnu khan Sikkim sorkarah pawh NRC kalpui ve duhna thlen an tam thu a sawi a, hemi chungchangah pawh hian sorkar chuan thutlukna an la siam lo niin a sawi bawk.

Tun dinhmunah hian Arunachal Pradesh, Nagaland leh Mizoram-ah ILP hi kalpui mek a ni.

Nationalist Sikkim United Organisation (NSUO) general secretary Tshering Wangchuk Lepcha chuan an state chu an tlai tawh hle nia sawiin dan loa state chhung lut an pun zel chuan an hnam tihdan phung, socio-economic leh demographic pattern-te chu nasa takin a nghawng thei dawn niin a sawi a ni.