Arunachal-ah constable 1535 kaisan tir

Chief Minister Pema Khandu kaihhruai Arunachal Pradesh chuan Arunachal history-a la thleng ngai lo, Arunachal Pradesh Police constable 1535-te chu a rualin Head Constable rank-ah an kaisan tir.

State police department chuan constable tam tak kaisan leh Chief Minister hnena lawmthu sawina Alankaran Samaroh chu Zirtawpni khan an buatsaih a ni.

He hunah hian Chief Minister Pema Khandu chuan thu sawiin Arunachal Pradesh Police hnuaia Civil Police/AAPBn/IRBn-a Constable-te chu hun rei tak kaisan tir loh an nih thu a sawi a, kum 20-30 hnuah pawh kaisang lo an awm ṭhin thu sawiin an rank ngai renga retire te pawh an awm tih a sawi. Hei hian department hnathawhnaah nghawng a nei tih sawiin police force hma lam hun atan a ṭha lo tih a sawi bawk.

Hemi anih avang hian sorkar chuan constable kum 20 chin service tawh te chu kaisan tir turin thutlukna an siam tih a sawi a ni.

Pema Khandu chuan sorkar hmalakna chu Arunachal history-a thil chhinchhiah tlak tak a nih a rin thu sawiin hnaa lungawina pawh a thlen ngei a beisei thu a sawi.

He hunah hian Deputy Chief Minister Chowna Mein, Home Minister Kumar Waii, State BJP President Tapir Gao, Chief Secretary Satya Gopal, DGP SBK Singh leh mi pawimawh eng emaw zat an tel a ni.