AP-ah India leh China sipai ten meeting nei LAC Remna leh Muanna awm remti

Arunachal Pradesh-a Tawang district bula Bumla-ah Zirtawpni khan Army official-te leh Chinese PLA sipaite chuan high level meeting an nei.

Meeting-ah hian India leh Chinese lam hian an inṭhianṭhatna tihngheh zela remna leh muanna Line of Actual Control (LAC)-a awmtir chhunzawl zel an remti.

India team hi Major General PGK Menon chuan kaihruaiin Chinese lam hi Major General Li Xi Zhong chuan a kaihruai thung a, ram pahnih puanzar hi zar niin ram pahnih ten inkungaihna ṭha zawk an neih dan tur te sawi ho a nih thu defence ministry thuchhuah chuan a tarlang.

Defence thuchhuah chuan Zirtawpni-a meeting hi ram pahnih major general te ve ve in 1990 hnu lama border personnel meeting (BPM) an telpui leh vawikhatna a nih thu an tarlang bawk.

Kar hmasa Nilaini khan ram pahnih sipai te hian Diwali thilpek te an lo inpe tawn tawh bawk a, chibai te pawh an inbuk tawn a ni.

Thuchhuah an siamah chuan BPM Bumla-a hun hman hi ram pahnih ten inbiakna ṭha zawk neih chhunzawm zel an tumna kawng khat a nih thu tarlan niin hei hian rorelna mai piah lamah military lam pawh a huam niin an tarlang.

Bumla hia Tawang khaw hmar lam km. 42-a hlaa awm niin ft. 15,000-a sanga awm a ni a, India leh China hian Bumla-ah hian inbiakna vawi nga lai an lo nei tawh a ni.