Court-in Assam CM lakah case ziak lut turin police a hrilh

Assam-a local court chuan Congress party Lok Sabha MP Abdul Khaleque -a'n chief minister Himanta Biswa Sarma chungchanga complaint a thehluh behchhanin, CM lakah hian case ziak lut turin police-te a hriattir.

Congress MP Khaleque hian sorkar rama chengte chhuahtir chungchangah CM hian inhuatna chawk chhuah thei zawngin thu a sawi niin a puh a, nikum December 29 khan Dispur police station-ah complaint a thehlut a ni. Mahse complaint a thehluh hnuah pawh police station hian CM Sarma lakah FIR an ziak duh lo a, hei vang hian Congress MP hi court lamah a kal leh ta niin a advocate Shamim Ahmed Barbhuyan chuan a sawi.

Sub-Divisional Judicial Magistrate, Biswadeep Baruah chuan Chief Minister Sarma-a'n Darang district-a Gorukhuti biala eviction drive kalpui chu kum 1983-a Assam Agitation neih laia mi ṭhenkhat thah an nih avanga phuba lakna nia a sawi chungchanga Khaleque-a complaint thehluh behchhan chuan Dispur police station-a OC chu CM lakah FIR ziak lut turin a hrilh. He thupek hi Thawhṭanni khan tichhuakin, CM thusawi chungchang pawh dik taka chhui chiang a, a rang thei anga Final Form thehlut turin a ti bawk a ni.

MP Khaleque hian CM chu nikum September thlaa Gorukhuti-a eviction drive neih laia CM thusawi hi Muslim huatna chawh chhuah theihna, human rights palzutna lian tak a ni tiin, Chief Minister chuan ram danpui behchhana a thutiam lo lak tawhte a bawhchhia a ni, a ti.

Nikum September 20 leh 23-a Gorukhuti-a Dhalpur I, II leh III khuaa state sorkarin eviction drive a neihah khan chenna in 1,200-1,400 vel tihchhiat niin, mi 7,000 chuang chenna in nei loin an awm phah a ni. Chenna in bakah bazar, mosque leh madrassa-te pawh tihchhiat tel a ni bawk. Hemi ṭuma buaina thleng vang hian police-te silai hmehpuahah mi pahnih an thi a, mi 20 chuangin hliam an tuar bawk a ni.