Assam-Meghalaya border-a khaw 36 zinga 30 Meghalaya state-ah an awm chhunzawm dawn : CM

Meghalaya chief minister Conrad K Sangma chuan Assam nen ramri buaina chinfel an tum mekna, hmun paruk-a thingtlang khaw 36 awm zinga khaw 30 chu Meghalaya state lamah an bet chhunzawm zel dawn tih a sawi.

Chief Minister hian Thawhṭanni khan Legislative Assembly inkhawmah Assam sorkar nena ramri chinfel tuma hma an laknaa an hmasawn dante a sawi a ni.

Sangma chuan state pahnihte hian ramri chungchanga inremna siam tur hian January thla tawp khan Memorandum of Understanding (MoU) an ziak tawh tih a sawi a, hmun paruka buaina chinfel dan tura rawtna an siamte pawh prime minister Narendra Modi leh union home minister Amit Shah hnenah thawn a ni tawh a ni, a ti.

State pahnihte hian ramri buaina an neih mekna, hmun 12 zinga hmun paruka buaina hi chinfel hmasak phawt an tum a ni. Hemi atan hian regional committee pawh an din ve ve bawk. State pahniha regional committee-te rawtna siamah ramri hrula khaw 36 zinga khaw 30-te hi Meghalaya lama awm tura tih an ni tih Chief Minister chuan a sawi. Thingtlang khaw 36-te hian square km 36.9-a zau an awh a, Meghalaya lama bet tura tih khaw 30-te zau zawng hi square km 18 chuang a ni.