Damdawi-inah NSCN-IM hotu Muivah enkawl mek

National Socialist Council of Nagalim-Isak-Muivah (NSCN-IM) hotu Thuingalen Muivah chu Dimapur-a Christian Institute of Health Sciences and Research (CIHSR) hospital-ah enkawl mek a ni a, mahse a ngaihtuahawm tawh lo niin doctor-te chuan an sawi.

Thuingalen Muivah hi kar liam ta Zirtawpni khan a pum na avangin NSCN-IM headquarters, Hebron aṭangin helicopter-in Dimapur-ah phurh a ni a, Christian Institute of Health Sciences and Research (CIHSR) hospital-ah enkawl a ni. A pum na pawh hi ziaawm tawhin, hma a sawn zel tih doctor-te chuan an sawi a, mahse damdawi-in aṭanga a chhuah theih hun tur erawh an sawilang lo.

Nikum July thla khan Muivah hi Covid-19 hri a kai avangin Dimapur hospital-ah enkawl a ni tawh bawk.

Muivah kaihhruai NSCN-IM hi kum 20 chuang chu sorkar laipui nen inremna kawng zawngin inbiakna an nei tawh a, kum 2015 August thla khan Framework Agreement an ziak a ni.