Assam Panchayat inthlanah AGP in BJP thawhpui dawn lo

Assam-a Bha­ratiya Janata Party (BJP) in sorkarna a siampui Asom Gana Parishad (AGP) chuan Thawhṭanni khan thuchhuah siamin Assam Panchayat inthlanah thawhpui an nei dawn lo tih an sawi.

Assam sorkarna siamtu zingah hian BJP bakah hian AGP leh Bodoland People’s Front (BPF) te an tel ve a ni.

AGP hruaitu Ramendra Narayan Kalita chuan an party chuan pan­chayat poll-a anmahnia ding turin thutlukna an siam tih a sawi a, BJP an thawhpui dawn lo tih a sawi a, a chhan erawh a sawi lang duh lo thung.

Assam Panchayat inthlan hi thlaleh hian neih a ni dawn a ni.

He thu a sawi lai hian Health Minister Himanta Biswa Sarma pawh a awm ve nghe nghe a, Sarma chuan AGP thutlukna chu an party chuan an pawm thu a sawi. AGP leh BPF chu an thawhpui ni mah se panchayat inthlanah anmahnia an ding duh a nih chuan an pawm tih a sawi.

AGP leh BJP hi Citizenship (Amendments) Bill 2016 chung changah an ngaihdan a inang lo nia tarlan a ni a, AGP hi Citizenship (Amendments) Bill dodal tu zingah an tel a ni.

Prime Minister Narendra Modi kaihhruai BJP sorkar hian Parliament-ah bill hi pawm an tum a, hei hi political party hrang hrang leh civil society hrang hrang te chuan an dodal nasa hle a ni.