Manipur: Amur Falcon thah vangin airgun hman khap

Manipur-a mu chi khat lar tak thlawk lut Amur Falcon, 'Manipur' tia a hming an phuah thah a nih hnu ni hnihah Tamenglong leh Noney district-ah chuan district thuneitu ten airgun hman an khap.

District thuneitute chuan thupek khauh tak tichhuakin sai­rawkherh emaw ralthuam eng pawh hmanga mu humhalh te kap an awm leh a nih chuan dan angin an chungah hremna na tak an lekkawh dawn tih an sawi.

Noney district deputy commi­ssioner Hungyo Worshang chuan sava himna chu an ngaih­pawi­mawh thu sawiin an cham chhung chuan humhalh an tum tih a sawi a, Guangram, Puichi, Rangkhung leh Taobam thingtlang khaw bula luang, Irang lui velah an chen thu a sawi.

Kar hmasa khan Amur Falcon ‘Manipur’ chu Tamenglong leh Noney district inrina Kebuching area-ah kahhlum a ni a, scientist ten an chhuah aṭanga nilinaah kahhlum a ni.

November 5 khan scientist te chuan Amur Falcon hi pahnih an chhuah a, pakhat zawk hi miin an lo kap a ni.

Forest Minister Th. Shyam­kumar pawhin sava hi veh an awm chuan an chhuah dawn lo tih a lo sawi ve tawh bawk.