AP sipai leh police buaina: Sipai pakhatin SP silai in tin thu tarlang
Arunachal Pradesh-a Bomdila-a police leh sipaite inkara buaina chhuak chuan ziaawm lam a pan mai dawn lo niin a lang a, police report chuan sipai pakhatin SP silaiin a tin niin a tarlang.
State DGP hnena report pekah sipai pakhat light machine gun keng chuan local SP chu a tin nia tarlan a ni a, midang pawhin police-te tihhlauhthawn nan hian van lam hawiin silai an hmetpuak nia tarlan a ni bawk.
Bomdila SP Raja Banthia chuan Arunachal scout pahnihin sipaite hi an fuihpawrh niin a sawi ve bawk a ni.
Banthia-an DGP hnena report a pek hi Chief Minister Pema Khandu leh Governor B D Mishra hnena thehluh tur a nih rin a ni. Police-te chuan he thubuai kaihhnawihah hian West Kameng district-ah sipai te lakah hian FIR panga an ziak lut tawh bawk.
Defence lam chuan hemi chungchangah hian thuchhuah an siam duh lo thung.
Bomdila-ah hian November 2 khan sipai pahnih chu civil mite laka an khawsak dan a mawi loh avangin police-te chuan station-ah an hruai a ni. Heng mite hi chhuah an nih hnuah police te hian an sawisa nia sawiin sipai eng emaw zat chuan Bomdila police station hi panin buaina a chhuak a, police station bungrua pawh eng emaw zat tihchhiat a ni bawk.
Army Chief General Bipin Rawat pawhin pawikhawihtu chu hrem an nih dawn thu sawiin, sipaite chu an thiam lo zawk a nih chuan an lakah hremna lekkawh ngei a nih dawn thu a sawi a ni.