NSCN-IM leh NSCN-K hel man

Arunachal Pradesh-a Long­ding battalion te chuan Thawhṭanni khan National Socialist Council of Nagaland- Isak Muivah (NSCN-IM) hel pakhat an man.

An mi man hi Akham Wangsu a nih thu tarlangin pawikhawihna kaihhnawih lehkha bakah hel pawl mi leh sa a ni ngei tih finfiahna an man tel bawk nia tarlan a ni.

An mi man hi thu an zawhfiah hnuah Longding district-a pawikhawihna eng emaw zatah a inhnamhnawih tih tarlan a ni a, NSCN-IM-ah hian Major a nih thu tarlan a ni bawk.

Wangsu hi 2017 khan Long­ding-ah man a lo ni tawh a, kumin July khan bail a chhuah a nih hnuah man a ni leh ta a ni.

Defence lam chuan DAO DIVISION kaihhruaina hnuaiah Longding battalion chuan south Arunachal Pradesh-ah remna leh muanna a awmna turin beihpui an thlak fo tih a sawi a, hel lakah pawh beihpui an thlak fo tih an sawi.

Hetihlai hian Nagaland state khawpui Kohima-ah pawh Natio­nal Socialist Council of Nagaland- Khapalang (NSCN-K) hel pakhat HQ IGAR (North) kaihhruaina hnuaiah man a ni ve bawk.

Security force-te chuan an mi man hming hi an tarlang lo a, kum 34 mi a nih thu erawh an tarlang.

NSCN-K hel an man hi June 22, 2017 khan man a lo ni tawh bawk a, mahse kumin February thla khan an chhuah a ni.

Defence thuchhuah chuan NSCN-K hel an man hi kumin kumtir lama an chhuah tawh kha ni mah se hel pawl tan chhiah a khawn leh tih an sawi a, hemi anih avang hian September kar tawp ber aṭang khan an chhui zui leh tih an sawi.

South Police Station, Kohima OC kutah hlan a ni a, chhuizui a ni dawn niin an sawi bawk.