Guwahati-ah CAA duh lohna lantir leh ṭan

Assam khawpui, Guwahati-ah Nilaini khan Anti-CAA Coordination Committee (CAA Virodhi Samanvay Samiti) huaihawtin Citizenship Amendment Act (CAA) duh lohna lantir leh ṭan a ni. 

CAA duh lohna lantirnaah hian he dan siamin Assam mipuite tana nghawng ṭha lo a neih theih dan hrang hrangte tarlan a ni a, sorkar laipui hnenah a dan siam hi ṭhiat leh nghal turin an phut. 

Guwahati-a nawrh huai­hawtte chuan an state-ah CAA aiah NRC hmang zawk tura an phut thu sawiin, sorkar chu democratic kalphung ni loa cheah an puh a ni. 

Pungkhawmte chuan, "Kum 2021 chauh hi BJP in ro an rel theih hun a ni tawh ang. State leh hmarchhak bial mipuite tana harsatna leh buaina nasa tak an thlen avangin, mipuite chuan BJP sorkar hi an thlang nawn leh tawh lo ang," tiin an sawi. 

CAA duh lohna lantir avanga man, Akhil Gogoi, Debangana Kalita leh midangte chu intiamkamna eng­mah siam loa chhuah nghal turin sorkar an phut tih an sawi a, committee senior member Deben Tamuly chuan, "State mipuite hnenah BJP-in sorkarna a chelh leh chuan an tan harsatna nasa zawk a la thleng ngei dawn a ni tih hrilhhriat kan tum leh dawn a ni," a ti.