Amit Shah-a'n Tripura a tlawh

Union home minister Amit Shah chuan Thawhlehni khan Tripura tlawhin, Agartala-a rally a neihnaah nakkum-a state assembly inthlan neih tur atana BJP election campaign chu virtual-in a hawng nghal.

Amit Shah chuan kum 25 chhung CPI(M) rorelna hnuaiah Tripura chuan nasa takin a tuar a, BJP-in sorkarna an chan ve hnuah chauh state chhung boruak pawh a muanawm ve chauh a ni, a ti. Nakkuma assembly an neih turah BJP bawk chu thlan tlin leh an nih chuan, an party chuan Tripura chu India rama state ṭha berah a siam thei dawn a ni, a ti.

Tripura-ah hian kum 2018 khan kum 25 zet sorkarna lo siam tawh, CPI(M) hnehin BJP-IPFT ṭangrual sorkar hi a ding ṭan a ni.

Shah chuan a hma chuan Tripura-ah chuan tharum thawhna, eirukna leh ruihhlo lama sumdawnnate a hluar a, mahse tunah chuan BJP rorelna hnuaiah mahni intodelhna kawng lam a zawh mek tawh a ni, a ti. Tripura-a pawikhawihna thleng pawh 30% velin a tlahniam tih a sawi.

BJP kaihhruai sorkarna hnuaiah state chhunga loneitute sum lakluh pawh a letin a pung chho a, state per capita income pawh kum li chhungin Rs nuai 1.30 ah a pung tih Shah chuan a sawi. PM-KISAN scheme hnuaiah loneitute chuan kumtin Rs 6,000 an dawng a, hemi atan hian sorkar chuan cheng vaibelchhe 400 a ruahman tih a sawi bawk.

Amit Shah hian Tripura-a sorkar hna laknaah hmeichhiate tan 33% ruahman a ni dawn tih a sawi bawk a ni.

Union Home Minister hian Gujarat-based National Forensic Sciences University (NFSU) Tripura campus lungphum a phum bawk a, hei hi hmarchhak biala a hmasa ber tur a ni. He campus hi state khawthlang lam, Anandanagar-a Srinagar-ah ram acre 50-a zauah siam a ni ang.