Assam nena ramri chungchanga inremna siam turah TMC-in hmanhmawh lo turin Meghalaya CM a ngen

Meghalaya assembly-a eptu party awmchhun, Trinamool Congress (TMC) chuan chief minister Conrad K Sangma chu Assam nena state ramri chungchang inremna siamna turah, ram inthleng ngaite a tel avangin inremna ziahfel hi hmanhmawh lo turin an ngen.

TMC MLA George B Lyngdoh-a'n hemi chungchang motion a put luh chu a thlawp thu sawiin Leader of Opposition, TMC hruaitu Mukul Sangma chuan, "State sorkar chu inremna hi la ziakfel mai lo a, he thilin nghawng a neih dan turte uluk zawka ngaihtuah leh phawt turin kan ngen a ni," tiin Thawhlehnia assembly inkhawmah a sawi.

CM Sangma hian Thawhṭanni khan assembly-ah Assam nena ramri chinfelna tura inremna an duanah, buaina an neihna hmun ramri hrula thingtlang khaw 36 zinga 30 chu Meghalaya state lamah an beh chhunzawm tur thu a sawi a ni.

Assam leh Meghalaya hian ramri buaina hmun paruka inremna tura ruahmanna an siamte hi ministry of home affairs-ah enfiah turin an thawn tawh a, state pahnih chief minister-te hian union home minister Amit Shah hmuin an sawipui leh dawn a ni.