Britannia-in Assam-ah hmeichhia tam zawk chhawr tum

Britannia Industries chuan Assam-a an plant-ah kumin chhungin hmeichhia tam zawk chhawr a, thawktu zinga 65% tlintir an tum tih a sawi.

Britannia plant hi Kamrup district-a Rampur hmunah awmin, tunah hian thawktu a nghet leh contract mode-in 1,367 an awm mek a, an zinga 60% chu hmeichhia an nih thu Britannia Industries Regional Manufacturing Head (East) Kishor Vinayak Kulkarni chuan a sawi.

Kulkarni chuan, "Kan society leh kan company-ah hmeichhiate hi mi pawimawh tak a ni. Kan hnathawhna hmunah hian kum telin thawktu hmeichhia pawh kan tipung zel a ni. Kumin kumtawpah chuan Rampur-a kan plant-a thawktu zinga 65% chu hmeichhia an nih hman ngei kan beisei a ni," a ti.

Rampur-a Britannia plant aṭanga ei tur an siamchhuah hi ni khatah ton 260 vel a tling pha a, thil chi ruk siamin heng zingah hian company flagship brand - Good Day, Marie Gold leh Nutrichoice te a tel.

Wadia Group hian Rampur-a an plant hi kum 2018, July thla khan an hawng a ni. Britannia-in greenfield manufacturing facility lian ber a siamna atan hian cheng vaibelchhe 170 a hmang a ni.