Meghalaya-in Covid vaccine la duh lo healtcare worker-te a zilh dawn

Meghalaya sorkar chuan state chhunga healthcare worker zinga Covid-19 vaccine la duh lote kawmin a zilh dawn.

Official-in a tarlan danin, Meghalaya-ah hian healthcare worker 28,708 awmin, an zinga 2,505 hian Covid-19 vaccine an la duh lo a ni. Vaccine la duh lo zingah hian doctor-te pawh an tel niin a tarlang.

Indian Institute of Public Health, Shillong-in tun hnaia khawpui chhunga hospital palia survey a buatsaihah doctor, nurse leh healhcare worker dang zingah vaccine la duh lo an awm hi tarlan a ni. Sorkar hospital-ah healthcare worker vaccine la lo zingah hian doctor 93 leh nurse 462 an awm a, private hospital-a doctor 43 leh nurse 144 pawhin vaccine hi an la lo bawk.

Health minister James PK Sangma chuan hemi chungchangah sorkar chuan healtcare worker, vaccine la lote hi zirtirna neihpui lehin, a zilh dawn tih a sawi. Vaccine-in taksa lama nghawng ṭha lo a nei nia sawite chu mi ṭhenkhatin an lak duh loh phahna a ni tih a sawi bawk.

TMC MLA Himalaya M Shangpliang chuan sorkarin mipuite vaccine la vek tura a ngen leh a nawr reng laia healthcare worker eng emaw zatin an la duh loh chu thil pawi tak a nih thu a sawi a, NCP MLA SA Sangma pawhin vaccine la lote hi chawlh tir turin sorkar chu a ngen bawk a ni.