Bangladesh-a Rohingya camp-ah kangmei chhuak

Bangladesh chhim chhak lam, Cox's Bazar-a Rohingya refugee camp-ah Thawhlehni khan kangmei a chhuak leh a, mipa naupang pakhat kang hlumin, in 300 vel kangin mi 2,000 vel chenna tur nei loin an awm a ni. Hei hi Rohingya camp-a kangmei a chhuah ṭum rukna a ni.

Thawhlehnia kangmei chhuahna hi Kutupalong camp-ah a ni. Raltlante awmna hi mau leh tarpaulin-a siam a nih avangin kangmei a kangkai chak hle a, darkar eng emaw zat hnuah an thunun thei chauh niin Bangladesh official, Mohammed Shamsud Douza chuan a sawi. Kangmei chhuah chhan hi hriat chian a la ni lo tih a sawi bawk.

Cox Bazar-a refugee camp-ah hian Rohingya raltlan hi maktaduai khat chuang an awm a, an zinga a tam zawk chu kum 2017-a Myanmar sipaiten an beihna avanga tlanchhiate an ni.

Kumin January thla khan camp-a kangmei chhuak vangin in 1,200 a kang chhia a, mi 5,000 vel chu chenna in nei loin an awm phah tawh bawk. January leh March thla inkarah camp-ah hian kangmei tenau ṭum li a chhuak tawh bawk a ni.

Bangladesh-a Save the Children country director Onno van Manen chuan raltlante khawsakna hmun hi kangmei laka him zawk tur, hmanraw ṭha deuh hmanga sak a ṭul tih a sawi.