Manipur-ah Indopui II hunlaia bomb hmuchhuak
Manipur-a Moreh khuaah Indopui II-na hunlaia mi nia hriat bomb 122 vel hmuh chhuah a ni.
Police-te chuan heng bomb-te hi Thawhlehni zing dar 10 vel khan Moreh ward 9 huam chhunga in sakna tura lei laihna hmunah hmuhchhuah a ni tih sawiin, police station-ah dah ṭhat nghal an ni tih an sawi.
Indopui II hunlai khan Manipur-ah hian Japan sipai leh ṭangrual sipaite an inbei nasa a, sipai thi leh hliam pawh eng emaw zat an awm a ni. Imphal leh Kohima-a indona hi National Army Museum, London chuan British sipaite telna indona nasa ber tiin a sawi hial.
Kum 2017 April thla khan Moreh khuaah vek hian lei laihnaah Indopui II-na hunlaia mi vek bomb 18 leh silai 600 hmuh chhuah a lo ni tawh bawk.