Meghalaya CM-in 2022-23 state budget a pharh

Meghalaya chief minister, finance changtu ni bawk Conrad K Sangma chuan Nilaini khan Assembly House-ah kum 2022-23 atana state budget a pharh a, sum indaih lohna tur hi Rs vbc 1,849 a tling.

Kum 2022-23 chhunga state-in sum a hmuh tura ruahman chu Rs vbc 18,700 niin, heng zingah Rs vbc 2,665 chu capital receipt niin, revenue receipt hi Rs vbc 16,035 tura chhut a ni. Hetih lai hian sum hmanral tura ruahman chu Rs vbc 18,881 a ni thung a, revenue expenditure-ah Rs vbc 15,376 leh capital expenditure-ah Rs vbc 3,505 a ni ang. Sum indaih lohna tur, Rs vbc 1,849 hi GSDP aṭanga 4.5% vel a tling.

Budget-ah hian kum 2022-23 atan interest payment-ah Rs vbc 1,110 leh pension payment atan Rs vbc 1,469 dah a ni bawk.

Chief Minister chuan a kaihhruai sorkar chuan Meghalaya state chu India ram state ṭha zual 10 zinga tel tir tumin a bei tih a sawi a, budget thar pharh tak pawh hian an thil tum tihhlawhtlinna tur kawngah a hruai thei dawn a ni, a ti.

Kum 2022-23 atan road sector hnuaiah project thawh mek leh a thar siamna turin Rs vbc 1,770 ruahman a ni a, heng zinga Rs vbc 519 chu PMGSY tan, rural road leh state road project hrang hrang tan Rs vbc 220 dah a ni.

Transport sector-ah Rs vbc 101 dahin, helicopter service pawh Williamnagar, Dawki leh Sohra-ah tih thar tum a ni.

Health sector tan Rs vbc 1,617 dah a ni a, hei hi financial year kal meka dah aiin 28% in a tam zawk. ‘Meghalaya Health Systems Strengthening Project’ bik atan Rs vbc 60 dah a ni a, ‘Chief Minister’s Safe Motherhood Scheme’atan Rs vbc 25 dah a ni bawk.

Tourism sector thuam chak pawh sorkarin a ngaih pawimawh tur thu sawiin, CM chuan Rs vbc 1,450 senna tur ecotourims project pahnih thawh mek a ni tih a sawi a, heng project pahnih hnuaiah hian kum nga chhunga state chhunga hmun hrang hrang 50-ah tourism infrastructure siam a ni dawn a ni, a ti.

'Shillong Peak Ropeway' siamna tur pawh buaipui chhoh mek niin, kum 2022-23 chhungin hna thawh ṭan a ni dawn a, he project atan hian Rs vbc 116 ruahman a ni.

Shillong khawpuia traffic tawt tihziaawmna turin state sorkar chaun pool school bus system a kalpui dawn a, hemi atan hian mini-bus 100 vel hman a ni ang. Shillong khawpui chhunga public transport atan electric bus hman ṭan tum a ni bawk.

'Meghalaya Youth Policy' pawh financial year kal mekah pawm a ni a, he policy hnuaiah hian ṭhalai 10,000 te soft skill lama training pekna tura programme siamin, hemi atan hian Rs vbc 10 dah a ni. Music leh creative arts lam chawilarna leh event hrang hrang huaihawtna turin Rs vbc 20 dah a ni bawk. Chief Minister chuan kum 2022-23 chhunga ṭhalaite pual budget hi Rs vbc 1,363 a tling a, hei hi budget pum aṭanga 7% a tling phak a ni, a ti.