Sorkar laipuiin Meitei extremist group pasarih khap chhunzawm

Sorkar laipui chuan Thawh­lehni khan thuchhuah siamin, Meitei extremist group pasarih a khap mek te chu kum nga dang an khap chhunzawm dawn tih a sawi.

Heng pawl pasarih te hi an faction, wing leh front organisa­tion-te nen Unlawful Activities (Prevention) Act hnuaiah dan pawna hnawl an nih thu Home Ministry thuchhuah chuan a tarlang.

Sorkar laipuiin Metei pawl a khap te hi - People’s Liberation Army (PLA) leh an political wing the Revolutionary People’s Front; United National Liberation Front (UNLF) leh an armed wing the Manipur People’s Army; People’s Revolutionary Party of Kangleipak (Prepak) leh an armed wing the ‘Red Army’; Kangleipak Communist Party (KCP) leh an armed wing ‘Red Army’ tia koh tho; Kanglei Yaol Kanba Lup (KYKL), Coordination Committee leh Alliance for Socialist Unity Kangleipak (ASUK)-te an ni.

Home Ministry thuchhuah chuan heng pawl pasarih te hi khap chhunzawm an nih chhan chu India aṭanga Manipur lakhran an duh vang niin an tarlang a ni.

Thuchhuahah hian heng Meitei pawl te hian an thil duh tihhlawhtlin nan hian hnathawk an rawih bakah ralthuam te an chelek tih an tarlang. Security force, police-te leh sorkar hnathawk te bakah Manipur khua leh tui te an bei ṭhin niin an tarlang bawk. An ralthuam neih nan leh an sipai te training nan ramdang aṭangin ṭanpuina an hmuh bakah ramdang mite an be pawh tih tarlan niin, training an neih nan leh ralthuam an khawlna turin ṭhenawm ramah te camp an nei tih tarlan a ni bawk.

Heng pawl pasarih te hi pawi­khawihna 756 thlenga mawh­phurtua puh an ni a, mi 86 thahnaa inhnamhnawiha puh ni bawkin heng zingah hian security force 35 an tel nghe nghe. Heng pawikhawihna thleng hrang hranga puh an nihna te hi January 1, 2013 aṭanga July 31, 2018 chhunga thlengte a ni.

Unlawful Activities (Pre­vention) Act, 1967 (37 of 1967)-a section 3 sub-section (1) hnuaiah Ministry hian Meitei group te khapna dan hi an tichhuak a, hmanṭan nghal tur a nih thu an tarlang bawk.