NSCN-K ten inkahhai puan chhunzawm an duh

Nagaland hel pawl Na­tio­nalist Socialist Council of Nagaland- Khapalang (NSCN-K) chuan Thawh­lehni khan thuchhuah siamin, sorkar laipui nena inkahhai an puan chu hman chhunzawm an duh thu an tarlang.

NSCN(K) hnuaia mi­nistry of information and publicity chuan Naga politics buaina chinfelna kawng atan India sorkar nena inkahhai puan chu chhunzawm an duh thu an sawi. Konyak-kaihhruai NSCN (K) chuan India sorkar, state sorkar leh Naga mipuite duhdan chu tihpuitlin an duh thu an sawi a ni.

NSCN(K) leh sokar laipui hian 2001 khan inkahhai hi an puang a, hei hian March, 2015 thleng kha a awh a ni. NSCN(K) hi pawl pahnihah inṭhen in Konyak hi kumin August thla khan Chairman a nihna aṭanga paihthlak a ni a, pawl pakhat zawk erawh hi chu SS Khaplang-a unapa fa Yung Aung kaihhruaina hnuaiah Myanmar-ah an inkulh mek thung.

Konyak hi paihthlak a nih hnu hian Nagaland-a Mon district-ah a lo let leh a ni.

New Delhi lam chuan Naga Mothers’ Association (NMA) leh Nagaland Gaon Burah Federation (NGBF)-te kaltlanga an hriattirnaah NSCN ten inremna an duh chu lawmawm an tih thu an sawi a, sorkar laipui chuan 2001-a inkahhai an puan kha an la vawng nung reng niin an sawi tih tarlan a ni bawk.