Assam sorkar in Ramdang miah Gorkha chhiar tawh dawn lo

Assam-a Gorkhali te D-Voters-a chhiar an nih avang leh harsatna hrang hrang an tawh ṭhin avangin kumin July thla khan All Assam Gorkha Students Union-te chuan union home minister hnenah memorandum an thehlut a ni.

Hemi kaihhnawihah hian Assam sorkar chuan Gorkha community chu ramdang miah an chhiar tawh dawn loh thu sawiin hamṭhatna an dawn theih tur chungchang pawh high court-ah an thlen dawn tih sorkar official chuan a sawi.

Federal ministry of home affairs in Assam sorkar hnena thupek a tihchhuah vang a nih thu tarlan a ni a, home affairs ministry chuan Assam sorkar hnenah hian Gorkha community ami, India khua leh tui nihna nei leh Nepalese document neite chu ramdang mi anga en theih an ni lo tih tarlangin, ramdang mi nia an hriat te erawh chu an document finfiahna an dil thei niin an tarlang bawk.

Sorkar official chuan Gorkha community tena document an hmuh­ah an duhthu a sam loh chuan electoral registration officers (ERO) chuan electoral roll-a an hming telhsak loh a phalsak niin a sawi.

Official chuan Gorkha com­munity-te chu an hming aṭangin leh Gorkha organization aṭang te in an hre hrang thei dawn tih a sawi a, Doubtful Voter (D Voter)-a chhiar an nihna chu an document a fel chuan hnawlin ramdang mi angin an chhiar tawh dawn lo niin a sawi a ni.

AAGSU president Prem Tamang chuan dik lo taka D-Voters zinga chhiar Gorkha 20,000 an awm tih a sawi a, heng mite hi an document pawh a fel vek niin a sawi. Hetihlai hian NRC draft list-a tel lo Gorkha 150,000 an awm tih sawiin, heng mite tel loh chhanah hian chhan hrang hrang a awm niin a sawi.

Tamang chuan sorkar in an ngenna pawm a, Gorkha commu­nity-te D-voters zinga a chhiar tawh dawn loh chuan mi nuai 1.5 te buaina chu an chingfel thei dawn niin a sawi bawk a ni.