Meghalaya-in HNLC nena inbiaknaa palai turin IAS officer hlui a ruat

Meghalaya home minister Lakhmen Rymbui chuan Hynñiewtrep National Liberation Council (HNLC) helpawl nena remna kawng zawnga inbiakna neih turah, palai hna thawk turin Indian Administrative Service (IAS) officer hlui, Peter S Dkhar ruat a nih thu a sawi.

February 9 khan state sorkar chuan HNLC-in sorkar nena remna zawnga inbiakna neih an duh tih an sawi chu a pawm thu a lo sawi tawh a, hemi hnu hian palai hna thawk turin tawnhriat nei ṭha, mithiam a ngaihtuah tih a sawi nghal bawk.

Hun eng emaw chen palai hna thawk tur hi ngaihtuah a nih hnuah, state sorkar chuan IAS officer chawl tawh, Dkhar hi ruat a nih thu a puang ta a ni. He hna a thawhnaah hian Minister of Home Affairs (MHA) adviser, North East leh Indian Police Service (IPS) officer hlui AK Mishra-a'n a pui ṭhin dawn tih Minister chuan a sawi.

Home Minister chuan HNLC-in inbiakna neih an duh thu an sawi hnuah, sorkar lam chuan aṭul angin hma a la nghal a, state chhunga boruak muanawm leh inremna a awm theihna atan te, state mipuite ṭhatna atante inbiakna hi ṭan thuai a nih a beisei thu a sawi bawk.