AP Budget session nei ṭan

Arunachal Pradesh Legislative Assembly chuan nimin aṭang khan budget session an nei ṭan a, ni nga chhung a awh ang.

Session ṭanni hian governor Brig (Retd) Dr BD Mishra chuan House-ah thu a sawi a, a thu sawi zawhah rorel inkhawm chhunzawmin sorkar bill 12 pharh a ni. Bill pharh zingah pariat hi higher education sector kaihhnawih an ni.

Finance changtu, deputy chief minister Chowna Mein chuan karleh Thawhṭanni, March 14-ah kum 2022-23 atana state annual budget a pharh dawn a ni.

Ningani khan state cabinet chuan joint consultative committee (JCC)-in Arunachal Pradesh Scheduled Tribe (APST) certificate pek dan chungchanga rawtna a thlen chu a pawmsak. Kaihhruaina siamah hian state leilung fa ni lo APST status pek leh; Arunachal hmeichhia, hnamdang pasal nei faten an nute hming hmanga APST certificate pekte chu hnawlsak an ni tawh dawn a ni. He kaihhruaina assembly-a ngaihtuah kher ngai tawh loin, sorkarin a lo pawmpuina turin notification pek a ni zawk ang.

JCC hian APST certificate pek dan chungchanga kaihhruaina siam dan tur hi Arunachal Indigenous Tribes Forum leh All Arunachal Pradesh Students’ Union (AAPSU)-te a sawipui hnuah rawtna hi a thlen a ni.