Assam by-election neihah BJP chak

Assam chief minister hlui, Sarbananda Sonowal bial chhuahsan, Majuli (ST) assembly constituency-a March 7-a by-election neihah BJP candidate Bhubam Gam chu thlan tlin a ni.

By-election result hi March 10-a state panga assembly inthlan result puan rual khan puan ve nghal a ni.

BJP candidate Bhuban Gam hian vote 67,242 hmuin, eptu pawlten candidate inṭawm an siam Chittaranjan Baumatary, Assam Jatiya Parishad (AJP) member chuan vote 42,141 a hmu. Candidate dang Bhaity Richong chuan vote 2,265 hmuin, 'None of the above' (NOTA)-ah mi 1,642 in an hmet bawk.

Majuli bialah hian CM hlui Sonowal hi a zawnin term hnih thlan tlin a lo ni tawh a ni. Mahse union minister for shipping, ports and ayush atana ruat a nih hnuah MLA a nihna aṭanga bangin, nikum September 27 khan Rajya Sabha member atan thlan tlin a ni a, a bial chhuahsan takah hian inthlan ṭhat buatsaih a ngai ta a ni.

Member 126 awmna, Assam Legislative Assembly-ah hian BJP hian member 63 neiin, a thawhpui AGP-in pakua leh UPPL-in pasarih a nei. Eptu party, Congress-in MLA 27, AIUDF-in 15, BPF-in pathum, CPI(M) in pakhat leh independent MLA pakhat an awm bawk a ni.