March 19 hmain Manipur sorkar thar siam tum

Manipur chief minister N Biren Singh chuan state assembly term kal mek tawp hun tur, March 19 hmain BJP sorkar thar siam tum a ni, a ti.

State assembly inthlan neih takah khan BJP hi party mala sorkarna siam thei turin thlan tlin a ni. Sorkar thara hruaitu tur pawh ni reiloteah tihfel a nih tur thu sawiin, ṭangrual sorkar ding meka an thawhpui, National Peoples Party (NPP) chu an thawhpui tawh dawn loh thu Chief Minister chuan a sawi.

Manipur-ah hian assembly inthlan neih dawnah BJP hian chief ministerial candidate a siam hran lo a, hei vang hian CM nilai Singh hi sorkar tharah a CM chhunzawm dawn leh dawn loh a chiang lo a ni. Kum nga chhung ṭha takin sorkar kaihruai mah se, party chhunga amah eltu an awm ve reng tho a ni.

Sorkar thar siam dan leh an thawhpui tur chungchangte chu an state rawn tlawh tur, BJP central observer-ten an tifel dawn tih CM chuan a sawi. BJP chuan party malin sorkarna siam thei dawn mah se, midangte nena thawhho chu an tihdan ṭhan a ni a, pawn lam aṭanga an sorkar lo thlawp duh turte chu an hnar dawn loh thu a sawi bawk.

Singh hian Zirtawpni liam ta khan sorkar thar dinna tura kawng hawn nan, chief minister a nihna atangin banna a thehlut. State governor La Ganeshan chuan sorkar thar din hma chu caretaker chief minister-a awm turin a lo ti a ni

JD(U)-in BJP sorkar thlawp dawn
Janata Dal (United) chuan Manipur-a BJP sorkar thar ding tur chu an thlawp dawn tih party hotu lu ber, Nitish Kumar chuan a sawi.

Manipur assembly inthlan neih zawh takah JD(U) hian seat parukah hnehna a chang a, BJP leh NPP dawtah awmin party zingah seat la hnem pathumna a ni. BJP hian seat 32 lain, NPP hian seat sarih an la.

Inrinni khan JD(U) party MLA thlan tharte chuan legislature party leader atan Khumukcham Joykisan Singh chu lungrual takin an thlang.

JD(U) bakah Nagaland People's Front (NPF) leh independent MLA pahnihte chuan BJP sorkar hi an thlawp tur thu an sawi bawk.

MLA thar zingah crorepati 48 an awm
Manipur MLA thlan thar 60 zinga 48-te chu mi hausa tawntaw, crorepati an ni.

Manipur Election Watch leh Association for Democratic Reforms (ADR) in MLA atana thlan tlinte affidavit thehlut a zirchiannaah hei hi a tarlang a ni.

MLA thar zinga 14 (23%) chu criminal case nei lai an ni a, mi 11 (18%) chu serious criminal case nei an ni. Kum 2017 inthlana MLA thlan tlin zingah khan criminal case nei hi 2 (3%) chauh an ni thung.

Kum 2017 assembly inthlana thlan tlin zinga 32 (53%) kha crorepati an ni a, kuminah erawh MLA thlan tlin zinga 48 (80%) chu crorepati niin, BJP MLA 25, NPP paruk, Congress panga, JD(U) panga,NPF panga leh Independent MLA pahnihte chu cheng vaibelchhe chuang hu nei an ni. MLA thlan thar 60-te sum neih hi chawhrualin mi pakhatin cheng vaibelchhe 3.75 hu zel nei ang an ni.