Sikkim : Khangchendzonga state university lungphum phum

India vice president M.Venkaiah Naidu chuan kar liam ta Zirtawpni khan virtual-in Taru, South Sikkim-a Khangchendzonga state university lungphum a phum.

He university hi ram acre 17-a zauah siam a ni dawn a, kum hnih chhunga zawhfel tum niin, a senso atan hian cheng vaibelchhe 582 ruahman a ni.

Vice President hian state khawpui, Gangtok atangin virtual hmangin lungphum hi a phum a, State university an neih vanga Sikkim mipuite a lawmpui thu sawiin, state sorkarin an state mipuite tana world-class education pek tuma hma a lakna chu a fak bawk.

Naidu chuan state university-ah hian tualchhung mite tana pawimawh, eco-tourism, horticulture, handicrafts leh handloom subject te dah tel turin a rawn bawk. Tualchhung mite talent chu hmasawnna ngel nghet dinna atan ṭangkai taka hman theih a ni, a ti.