Vawiinah Parliament budget sesssion thawh hnihna ṭan dawn

Parliament budget session thawh hnihna chu vawiin aṭangin ṭan a ni dawn a, April 18 thleng a awh ang.

Ram chhungah Covid-19 hri leng ziaawm chho tawh viau mah se, Parliament in hnih, Rajya Sabha leh Lok Sabha-ah Covid-19 kaihhruaina dante chu khauh taka kenkawh chhunzawm zel a ni ang. Ṭhut dan chungchangah pawh social distancing norm hman zel a la ni ang.

Ṭhut dan tur ruahman lawk angin, member 237 awm mekna Rajya Sabha rorel inkhawmah MP 139-te chu chamber-ah an ṭhu ang a, a bak chu gallery-ah an ṭhu thung ang.

Lok Sabha member 538 zinga 282, Prime Minister telin chamber-ah an ṭhu ang a, a bak 258 chu gallery-ah an ṭhu dawn bawk a ni. Press gallery-a ṭhu thei zat pawh a hmaa ruahmanna an lo siam tawh angin kalpui chhunzawm a ni dawn bawk.

Official guideline-in a tarlan angin, Parliament in hnihna sitting member-te chauhin Central Hall an tlawh theih a ni.

Budget session thawh hnihnaah hian rorel inkhawm hi chawhma dar 11 aṭanga tlai dar 6 thleng neih ṭhin niin, chhun chawlh darkar khat neih ṭhin a ni ang. Private Members' Business tan ni li dahin, Question Hour chu darkar khat neih a ni bawk ang. Session thawh khatnaa rorel inkhawm ṭum khata Zero Hour atana darkar chanve hun dah ṭhin pawh darkar khat dah a ni dawn tawh bawk.