Assam: Citizenship dodal pung zel, pawl 70 in duh lohna lantir

Citizenship (Amendment) Bill, 2016 duh lohna chuan ziaawm lam a pan thei lo a, Zir­tawpni khan Assam-a pawl 70-te chuan Citizenship Bill duh lohna an lantir.

Bill duh lohna lantirna a nasat avang hian Assam secre­tariat gherao programme pawh a tihbuai phah nia sawi a ni a, secretariat hi thirlena hung hial a ngaih bakah Assam Police leh CRPF force-te chu Bill duh lohna lantirtute lakah secretariat veng tur hian dah an ni bawk.

Assam Jatiyatabadi Yuba Chhatra Parishad (AJYCP) leh Krishak Mukti Sangram Samiti (KMSS)-te chu heng pawl zingah hian a langsar pawl an ni.

KMSS leader Akhil Gogoi kaihhruaina hnuaia Citizenship (Amendment) Bill, 2016 duh lohna lantirtute hian secretariat kawt an chiaha awm Dispur Press Club-ah Bill duh loh­na lantira punkhawm hi an huaihawt a ni. Assam-a Sarba­nanda Sonowal kaihhruai BJP sorkar chu mipuite leh ram leilung fate duhdan loa hna­thawkah an puh a ni.

Tunhnaia bill duh lohna lantirna a nasat avang hian Guwahati chhunga police station huamchhung ṭhenkhatah chuan Ningani khan CrPC Section 144 puan a ni tawh nghe nghe.

He nawrh huaihawtnaa thu­sawitu ṭhenkhat chuan bill duh lohna lantirna atana motorcycle rally nei te chu Guwahati-ah hian an luh phalsak an nih loh thu an sawi a, meeting nei tur hian police phalna an lak hma­sak thu te an sawi bawk.

Thusawitu ṭhenkhat chuan chief minister chu RSS thupek anga ro relah an puh a, Sonowal chu Hitler-a ang maia a rorel chu titawp tur leh mipuite duh anga rorel tur ten an ti a ni.

Police-te chuan mi 1000 thleng punkawm an phal thu sawiin mi 1000 aia tam an pun­khawm tawh avang hian Jonai, Diphu, Sadiya leh Dhubri aṭanga bike rally nei te pawh a huho ni lo in, a mal te te-a khawpui chhung luh an phalsak thu an sawi.

Sadia, Dhubri leh Diphu aṭanga bill duh lohna lantir tura kal tum te chu rel-ah an lawn phalsak an nih loh thu tarlan a ni bawk a ni.

Assam Director General of Police Dr Kuladhar Saikia chuan Ningani khan dan leh thupek bawhchhia an awm chuan an lakah hremna an lekkawh dawn thu a lo sawi lawk tawh nghe nghe a, Guwahati khawpui chhung chu uluk taka an vil dawn thu a lo sawi tawh bawk.

Citizenship (Amendment) Bill, 2016 hi Citizenship Act, 1955 siamṭhatna turin Lok Sabha-ah pharh a ni a, tun thlasik session-ah hian ngaihtuah tura ruahman a ni. He bill hi pawm a nih chuan Bangladesh, Pakistan leh Afghanistan mi, minority community-te chu India khua leh tuiah pawm an ni thei dawn a, hei hi ram leilung fate chuan duh lo in nasa takin an dodal a ni.