Panchayat inthlanah samak vehtu contest kan pawm thei lo : Aaranyak

Environmental leh biodiversity pawl ‘Aaranyak’ chuan thuchhuah siamin samak veh ṭhintu nia puh, Ganesh Doley-an Gaon Panchayat inthlana nomination a file chu an pawm theih loh thu an sawi.

Assam panchayat inthlan awm turah samak veh ṭhina sawi, Ganesh Doley hian Gaon Panchayat inthlan awm turah Golaghat district-a Dhansirimukh-ah AGP candidate turin Ningani khan nomination a file a ni.

Aaranyak Secretary General Bibhab Talukdar chuan samak veh ṭhin leh ralthuam hralh ruk lama thubuai nei ten inthlan awm turah political party ticket an chan thu sawiin dan lama thuneitute chu fimkhur tura a duh thu a sawi a, samak te himna chu ngaihpawimawh a ṭul thu leh samak veh ṭhinte chu dan hnuaiah hrem ni ngei se an duh thu a sawi.

Police-te chuan Doley hi Bokakhat-a samak veh vangin 2012 khan man a nih thu leh jail-a dah a nih thu an sawi a, 2014 khan Wildlife Protection Act and Arms Act hnuaiah man a ni leh bawk tih an sawi a ni.

Karbi Anglong-a Ronmongwe police station-ah Doley lakah hian thubuai thehluh a ni a, Eastern Range, Agaratali, Kaziranga National Park-ah pawh thubuai a nei nia sawi a ni bawk.

Tunah hian bail-a chhuah mek a nih tih police-te chuan an sawi bawk a ni.