Manipur MLA tharte rinawmna thu tiamtir ; Chief Minister tur tihchian a la ni lo

Manipur MLA thlan tharte chu nimin khan 12th Manipur Legislative Assembly member atan rinawmna thu tiamtirin lakluh an ni.

Protem Speaker, BJP senior MLA Soraikhaibam Rajen Singh chuan MLA tharte hi rinawmna thu a tiamtir a ni. Pathianni khan BJP chuan Protem Speaker atan Singh hi thlangin, hemi ni vek hian governor La Ganesan chuan rinawmna thu tiamtirin a lalut nghal a ni. Protem Speaker lakluh inkhawm hi chief minister N Biren Singh, chief secretary Rajesh Kumar, DGP P Doungel leh official dangten an telpui a ni. Assembly Speaker thlan fel a nih hma chuan Speaker chanvo hi a lo chelh rih ang.

Manipur assembly term kal mek hi March 19-ah a zo dawn a ni. Chief minister N Biren Singh chuan kar liam ta Zirtawpni khan chief minister a nihna aṭanga banna a lo thehlut tawh a, mahse Governor Satya Pal Malik ngenna angin sorkar thar a din hma chu caretaker chief minister angin a awm chhunzawm ang.

BJP sorkar thar hi eng hunah nge lakluh a ni dawn tih leh, sorkar tharah hian tunge Chief Minister ni dawn tihte chu engmah tihchian a la awm lo.

State assembly inthlan neih dawn khan BJP chuan N Biren Singh hi an party chief ministerial candidate leh, sorkar thar an siam leh pawha a hruaitu tur a nih thu a sawi a, mahse official erawh chuan enmgah a sawi lo thung. Inthlanah hian BJP hian seat 60-ah seat 32 lain, party malin sorkarna an siam thei dawn a ni. Mahse Chief Minister tur chungchangah party chhungah inhruipawhna a awm deuh nia sawi a ni.

BJP member ṭhenkhat chuan inthlana hnehna ropui tak an chan theihna tura hruaitu a nih avangin N Biren Singh hi CM-ah dah chhunzawm leh ngei turah an ngai a, hetihlai hian ṭhenkhat chuan CM-a dah leh a nih chuan an party hmasawnna atana hruaitu dangte inpekna hriatpui lo angah ngaih a ni dawn niin an sawi thung.

State BJP president A Sharda Devi chuan, "Chief Minister thar hi state unit hruaitute rawn chungin, party paliamentary board chuan a ruat dawn a ni," a ti.