Assam budget session : Governor thusawi a tihbuai vangin House aṭangin Akhil Gogoi chhuah tir

Assam Legislative Assembly budget session chuan nimin khan neih ṭan a ni a, session ṭanniah hian Governor Jagdish Mukhi thusawi a tihbuai avangin independent MLA Akhil Gogoi chu House aṭanga chhuahtir a ni.

Governor-in state sorkar hmalakna hrang hrangte a sawi laiin, Akhil Gogoi hian BJP sorkarin ṭhalai nuai khat hnena hna pek a tiam chungchang chu ṭum eng emaw zat lo sawichhuakin, Governor thusawi hi a lo tibuai a ni. Hei vang hian speaker Biswajit Daimary chuan Governor thusawi chhung chu House aṭanga chhuak turin Gogoi hi a hrilh a ni.

Speaker-in House chhuahsan tura a hrilh hnuah Gogoi hian kalchhuak mai loin, placard-te a pharh zui a, hemi hnu hian Marshal-te chuan House pawn lamah an hruaichhuak lui ta a ni. Gogoi hian hna nuai khat siam chungchang bakah, lonetiute thlai thar leisak dan, ram leilung fate tana land rights pek leh water scheme-a eirukna thleng chungchangte a lo sawichhuak bawk.

Gogoi hruaichhuah a nih hnuah Governor pawh hian thu a sawi zawm ve leh nghal a, "Inthlan dawna a lo tiam tawh angin, sorkar chuan ṭhalai nuai khatte hna pek ngei tumin hma a la mek zel a ni," a ti.

Governor thusawi zawhah Speaker chuan Gogoi hremna hi a titawp zui leh nghal a ni.