Assam NRC: Mi nuai 4.5 chiahin NRC-a telh leh dil
Assam in National Register of Citizens (NRC)- a kalpui mekah July 30-a draft list an tihchhuahah khan mi nuai 40 chuang tel lo mah se, list-a telh leh dil hi mi nuai 4.5 chiah an awm.
Supreme Court kaihhruaina hnuaia NRC kalpuina kawngah hian draft list tihchhuah hnuah thla hnih chhung claims and objections siamna hun hawn a ni a, hemi chhung hian mi nuai 4.5 chiah hian list-a telh leh hi an dil niin official-te chuan Pathianni khan an sawi.
Heng zingah hian ramchhunga dan loa awm nia ngaih zingah mi 200 chiahin an rinhlelhna khinletna tur application hi an thehlut bawk.
Claims and objections siam hun chhunga hming telh duh an tlem avang hian Inrinni khan New Delhi-ah High level meeting neih a ni nghe nghe a, hetah hian Home Minister Rajnath Singh, BJP president Amit Shah, Assam Chief Minister Sarbananda Sonowal, Union Home Secretary Rajiv Gauba leh Director of Intelligence Bureau Rajiv Jain-te pawh an tel nia sawi a ni.
Supreme Court pawhin NRC update meka claims and objections chungchanga standard operating procedure (SOP)-ah pawh thutlukna an siam tawh nia sawi a ni a, December 15 thleng claims and objections hi siam theih a ni ang. List-a telh leh dil theih hun hi September 25 aṭang khan hawn a ni.
SC chuan insawifiah tur te chu document 10 - land documents, permanent residential certificate state pawn aṭanga pekchhuak, passport, Life Insurance Corporation of India policy, sorkar thuneitu ten licence emaw certificate an pekchhuah hrim hrim te pawmsak an ni. Heng bakah hian sorkar emaw public sector hnuaiah emaw hna an thawk ngei tih tifiah tur document te, bank leh post office account, birth certificate leh educational certificate-te chu a ngai tel bawk.
November 1 khan 1951 NRC, electoral roll up to March 24, 1971, citizenship certificate, refugee registration certificate leh ration card-te pawh pawm a nih dawn thu SC chuan an lo sawi tawh bawk a ni.
June 30-a tihchhuah NRC draft list-ah hian NRC-a tel dil mi vaibelchhe 3.29 zingah mi vaibelchhe 2.9 chiah an tel mi, hming nuai 40 chuang chu an tel lo a ni.