ULFA(I) Commander-in-chief unaupa fa in an pawl zawm ve

Assam-a hel pawl United Liberation Front of Assam- Independent (ULFA-I) commander-in-chief Paresh Baruah unaupa fapa Munna Baruah chu chin hriat loha a bo hnuah ULFA-I hi a zawm ve niin Assam police-te chuan an sawi.

Munna Baruah hi kum 22 mi niin Paresh Baruah-a u Bimal-a fapa a ni a, Digboi oil refinery-a trainee nilai niin police-te chuan kar khat chuang a awmna chin an hre tawh lo niin an sawi a ni.

Tinsukia superin­tendent of police Mug­dhajyoti Mahanta chuan Pathianni khan Digboi police station-ah November 15 ah mi bo an awm thu complaint a lut tih a sawi a, tunah chuan ULFA(I) hi a zawm ve tih an chiang tawh nia sawiin Nagaland-a Mon kaltlangin Myanmar lamah a kal niin a sawi bawk.

Pallab Bhattacharyya, Director General of Police, Special Branch chuan Citizenship (Amendment) Bill duh loh vanga ULFA zawm ta an awm nual thu sawiin fimkhur a ngaih thu a sawi.

Bhattacharya chuan September thla aṭang khan mi 11 in hel pawl hi an zawm tawh tih sawiin Assam police-te chuan mi 11 vek an man tawh niin a sawi bawk.

Mahanta pawhin May thla khan tleirawl kum 16 mi, higher secondary school zirlai, kick boxer chu a bo thu sawiin he tleirawl pawh hian ULFA hi a zawm tih a sawi a ni.

Bhattacharya chuan media-te chu a dem thu sawiin Citizenship bill chungchang hi an tarlang nasa lutuk niin a sawi bawk.