Assam leh Meghalaya-in March 27-ah border agreement ziak dawn : Meghalaya CM

Meghalaya chief minister Conrad K Sangma chuan Assam leh Meghalaya chuan March 27 hian New Delhi-ah ramri chungchanga hinremna an ziak thei tawh dawn niin a sawi.

CM Sangma hian Assembly inkhawma zawhna a chhanah hei hi sawiin, union ministry of home affairs (MHA) nena an sawiho leh hnuah inremna hi a taka kalpui a ni tawh ang, a ti. "Tun thla chhungin MHA nena sawiho a, inremna pawh ziah fel hman tum a ni. A ni atan hian March 27 chu lo ruat lailawk phawt a ni," a ti.

Border agreement ziahnaah hian cabinet minister leh ramri buaina chinfelna tur buaipuinaa inhnamhnawih official dangte pawh Delhi-ah an kal vek dawn tih Sangma chuan a sawi bawk.

State pahnihten inremna an siamna tur hi ramri buaina an neih mekna hmun 12 zinga hmun parukah a ni.

Assam chief minister Himanta Biswa Sarma leh Meghalaya CM Sangma-te hian kumin January 29 khan Memorandum of Understanding (MoU) an lo ziak a, hei hi union home minister Amit Shah hnenah January 31 khan a lo enzui turin an pe tawh bawk.

MHA-in IPL phutna enfiah mek
Chief minister Conrad K Sangma chuan Meghalaya-a Inner Line Permit (ILP) system hman phut chungchang chu ministry of home affairs (MHA) in a zirchiang mek tih House-ah hian a sawi bawk.

"MHA chuan kan thil phut hi a zirchiang mek a, keini lamin kan nawr chhunzawm reng bawk ang a, thutlukna pawh an siam thuai beisei a ni," a ti. Kum 2019, December thlaa state assembly-in ILP hman phut chungchanga resolution an pass hnuah, state sorkar chuan MHA hnenah hian an thil phut tihhlawhtling tura ngenna lehkha pawh ṭum eng emaw zat a thawn tawh tih a sawi bawk. Nikum January 23-a union home minister Amit Shah-a'n Shillong a rawn tlawh ṭum pawh khan ILP chungchangah hian memorandum pawh an thehlut tih Sangma chuan a sawi bawk.