AP Dy CM-in state budget a pharh ; Sum indaih lohna tur Rs vbc 644.81

Arunachal Pradesh deputy chief minister, finance changtu ni bawk Chowna Mein chuan Thawhṭanni khan Assembly-ah kum 2022-23 atana state budget a pharh a, sorkar sum indaih lohna tur hi Rs vbc 644.81 a tling. Kumina chhiah lak belhna thar siam a ni lo tih Deputy Chief Minister chuan a sawi bawk.

State sorkarin kum 2022-23 chhung a sum hmuh tura a ruahman hi Rs vbc 26,111.63 niin, hei hi kum 2021-22 budget aiin 15.64% in a tam zawk. Sum hmuh tura ruahmanah hian Rs vbc 24,453.54 chu revenue receipt leh capital receipt-ah Rs 1,858.09 beisei a nih thu Mein chuan a sawi.

Hetih lai hian kum 2022-23 atana sorkarin sum a hman tur hi, revenue expenditure-ah Rs vbc 18,201.55 leh capital expenditure-ah Rs vbc 7.507.81 tura ruhman a ni a, capital expenditure-ah hian loan rulhna turte a tel.

Chowna Mein chuan kumin budget-a an thupui ber chu, 'mi tumah hnutchhiah bik an awm lo ang,' tih a ni, tiin a sawi. State sorkar chuan mipuite mamawh a ngaihven reng a, mitinte huap zo hmasawnna thlen turin hna a thawk zel dawn a ni, a ti.

Financial year 2022-23 chu state sorkar chuan 'Year of e-Governance' atan state sorkarin a puang a, hemi pual hian project 22 thawh a ni dawn tih a sawi. E-governance hnuaia hmalakna tur atan budget-ah hian Rs vbc 22 dah a ni.

International border-a model village pathum siamna turin budget-ah hian Rs vbc 30 dah a ni a, 'Water for all' campaign-na hnuaiah Rs vbc 100 sanction a ni bawk a ng. Stat sorkar chuan Arunchal Pradesh police infrastructure thuam ṭhatna turin Rs vbc 100 a dah a, oil palm plantation hungna turin Rs vbc khat ruahman a ni bawk.

Pakke, Namdapha, Ziro leh Pasighat-a butterfly park pali siamna turin Rs vbc khat dah a ni a, Itanagar chu Northeast Gas Grid (NEGG) project kaltlangin Gas Grid nena thlunzawm tum a ni.

District hospital 18-te chu tihchangtlun an ni dawn a, hemi atan hian Rs vbc 250 ruahman a ni a, primary leh community health centre 60 chu model facility-ah tihchangtlun an ni bawk ang.