AP Assembly-in RTI Act zirchiangtu tur committee din

Arunachal Pradesh Assembly chuan Right to Information (RTI) Act zirchiang tur leh, dan siamṭhatna tura rawtna siam turin member pathum awmna committee a din. Committee rawtna siam hi sorkar laipuiah an thlen leh dawn a ni.

Assembly inkhawmah senior Congress member Ninong Ering chuan RTI chu mi ṭhenkhatin an mimal hlawkna turin an hmangsual fo tih a sawi a, sorkar chuan hetianga dik lo taka hman a ni ṭhin venna turin Act siamṭhat dan ngaihtuah turin a ngen.

Chief minister Pema Khandu chuan hei hi chhangin, RTI Act hi kum 2005-ah Parliament-in a siam niin, Freedom of Information Act thlakna a nih thu a sawi a, he dan siamṭhat chungchangah hian state sorkar chuan thuneihna a nei lo tih a sawi. Hemi rual hian RTI Act zirchiangtu tur committee din a rawt a, hei hi rorel inkhawm kaihruaitu deputy speaker Tesam Pongte chuan a lo pawmpui nghal a ni. Hemi hnu hian committee hi dinin, Congress MLA Ering chuan a ho dawn a, member atan BJP member MLA Kento Jini leh NPP MLA Tarin Dakpe te ruat an ni nghal a ni.

Committee hian stakeholder hrang hrangte kawmin, law department official-te pawh an kawm dawn a, hemi hnu hian he Act siamṭhat dan tura rawtna an neihte chu Assembly session neih leh hunah state sorkar hnenah a thehlut ang. State sorkar chuan hei hi sorkar laipuiah a thehlut ve leh ang.