Tripura sorkarin tea plantation-a thawkte hlawh tisang

Tripura chief minister Biplab Kumar deb chuan thingpui huana thawkte hlawh chu Rs 105 aṭangin Rs 136-ah tihsan a nih thu sawiin, hlawhbi thar hi April, 2022 aṭangin hman ṭan a ni ang, a ti.

CM Deb chuan Tripura sorkar chhunga tea estate 54-a hnathawk, chhungkaw 7,000 chuangin hlawhbi thar siam hi an chhawr thei dawn tih a sawi a, 'Mukhyamantri Cha Shramik Kalyan Prakalp' scheme hnuaiah ni khat hlawh pawh hi tihsan a nih thu a sawi. He scheme hi thingpui huana thawk leh an chhungte chawikanna tura duan niin, he project atan hian sorkar chuan cheng vaibelchhe 85 a dah a ni.

State chhung thingpui chinna hmun 54 zinga a tam zawk chu mimal siam a ni tih CM chuan a sawi a, an state-a thingpui huante chu sorkar hmasa lamin a ngaihsak tawk lo a, mahse a kaihhruai sorkar chuan hma an sawnna tur leh an tharchhuah pawh a ṭhat zawk theihna turin hma a la mek a ni, a ti.