Assam sorkar hnuaia thawkte 'The Kashmir Files' film en turin half-day leave lak phalsak

Assam chief minister Himanta Biswa Sarma chuan kum 1990 chhoa Kashmir-a Hindu-te beihna leh Kashmir Valley aṭanga an tlanchhiat leh umchhuah an nih dan behchhana film siam, 'The Kashmir Files' film en turin sorkar hnathawkte chuan half-day leave an lak phalsak a nih thu a sawi.

Kashmiri Pandit-te thil tawn rapthlak tak tarlanna film hi Thawhlehni khan Assam cabinet member-te chuan Guwahati-a theatre-ah an lo enho tawh bawk.

CM Sarma chuan, "Kashmiri Pandit-te beihna rapthlak leh an pemchhuah a ngaih hial dan hi mihring nihna tihmelhemtu a ni. An tawrhna nasa tak lantirna film, The Kashmir Files hi cabinet member leh BJP leh a thawhpui MLA-te nen kan en a, rilru a khawih takzet," tiin he movie an en zawh hnuah hian a twitter-ah a tarlang.

Prime minister Narendra Modi pawhin he film hian thil thleng dik tak, a nihna ang takin a rawn pho chhuak a ni tiin a lo fak tawh bawk.

The Kashmir Files hi Vivek Agnihotri ziah leh direct a ni a, Anupam Kher, Mithun Chakraborty leh Pallavi Joshi-te an chang.

Tripura sorkar pawhin 'The Kashmir Files' film hi an state-ah chhiah a awl tir a, state chief minister Biplab Kumar Deb chuan mipuite chu he film hi en turin a sawm nghal bawk.

Vishwa Hindu Parishad (VHP) chuan Tripura sorkar thiltih dan chu lawmawm an tih thu sawiin, Tripura mipuite chu he film hi en a, Pandit-te an mahni ram ngei aṭanga um chhuah an nih dante chu thlir vek turin VHP West Tripura district president Bijoy Saha chuan a chah nghal bawk.

Kashmir Hindu-te tawrhna lantirna film hi mipui tam zawkin an en theihna turin Uttar Pradesh, Gujarat, Madhya Pradesh, Uttarakhand, Haryana, Karnataka, leh Goa sorkar pawhin he film hi chhiah an awl tir bawk a ni.