Manipur Chief Minister atan N Biren Singh thlang nawn

Manipur caretaker chief minister, N Biren Singh chu BJP sorkar thara chief minister turin thlan nawn nia sawi a ni a, mahse hemi chungchang hi nimin tlai thleng khan party lam chuan official-in an la puang lo.

Manipur-ah hian BJP sorkar thar a ding dawn tih hriatchian a nih hnuah pawh party lam hotute chuan chief minister tur hi an ruatfel mai lo a ni. Thawhlehni khan N Biren Singh leh Manipur state BJP chief A Sarda Devi bakah Th Biswajit Singh-te chu Delhi-ah kalin, sorkar thar siam dan tur chungchang chu central lama an party hotute an sawipui.

Nimin zing khan Biren Singh hian prime minister Narendra Modi leh union road and transport minister Nitin Gadkari-te a hmu a, tlai lamah union home minister Amit Shah a hmu leh bawk.

Footballer hlui, journalist aṭanga politician-a inlet, Biren Singh hi kum 2002 khan a ṭum khatna atan Manipur Legislative Assembly member-ah thlan tlin a ni a, Heingang constituency-ah Democratic Revolutionary People's Party hmingin a chuh a ni. Kum 2003-ah Indian National Congress party zawmin, kum 2007 state assembly inthlanah a bial ngaiah hian Congress party candidate niin thlan nawn leh a ni. Mahse kum 2016 khan Congress chhuahsanin BJP a zawm leh ta a ni.

Kum 2017-a state assembly inthlanah khan Biren Singh hi BJP ticket-in, a constituency ngaiah pawh a term lina atan thlan tlin a ni a, BJP kaihhruai sorkar dingin Chief Minister atan thlan a ni a, Manipur-a BJP chief minister hmasa ber a ni.