AIUDF-in 'The Kashmir Files' film khap turin sorkar phut

Assam-a All India United Democratic Front (AIUDF) chuan Bollywood film, Vivek Agnihotri direct 'The Kashmir Files' chu khap turin Assam sorkar a phut.

AIUDF hotu leh Lok Sabha member Badruddin Ajmal chuan he film hian khawtlanga lungawi lohna leh inhuatna a thlen thei niin a sawi.

Ajmal chuan, "He film hi ka la en ve lo a, mahse khap ngei erawh a ngai a ni. Kum 40 liam ta chhung khan Kashmir chauh ni lo, India ram hmun hrang hrangah thil tam tak a thleng a, Assam-ah ngei pawh kum 1983 khan Nellie insuatna a thleng a ni," a ti.

RSS leh BJP in an sponsor hnuah he film hi tihchhuah a ni tih sawiin, Ajmal chuan Hindu leh Muslim inkara inhuatna thlen thar leh thei a nih thu a sawi. Hei vang hian prime minister Narendra Modi leh Assam chief minister Himanta Biswa Sarma-te chu 'The Kashmir Files' hi khap nghal tura a phut thu a sawi.

Hetih lai hian he film hi BJP hruaitu hrang hrangte chuan an fak hle a, Prime Minister Modi ngei pawhin a lo fak tawh a ni. BJP sorkarna state ṭhenkhat chuan he film hi an state-ah chhiah an awl tir hial a, Assam sorkar pawh hian 'The Kashmir Files' en duh sorkar hnathawkte chu half-day leave lak a phalsak bawk.