Manipur bomb puak: UNLF in an tih a nih thu sawi Thubuai kaihhnawihah ASI man

United National Liberation Front (UNLF) chuan Inrinni khan thuchhuah siamin Zirtawpnia Manipur Assembly-a grenade tihpuah chu an tih a nih thu an sawi niin Thawhṭanni tlai khan tarlan a ni.

Manipur Assembly huamchhunga grenade puakah hian BSF sipai pakhat leh assembly staff pahnihin hliam an tuar a ni.

UNLF chuan an pawl armed wing Manipur People Army (MPA) tih a nih thu an sawi. Manipur sovereignty neih bo tawh chu pek let leh an nih loh chuan Indian Occupation Forces (IOF)-te chu an bei chhunzawm zel dawn tih sawiin an vau zui bawk.

Zirtawpni tlaia Assembly complex-a bomb puak thubuai kaihhnawihah hian Assembly security assistant sub-inspector (ASI) chu inhnamhnawiha rinhlelh vangin man a ni ve bawk.

Yumnam Deben Singh(56) hi Inrinni chawhnu khan man a ni a, police-te chuan UNLF-te nen hian an inbe pawp ngei tih a inpuan thu an sawi.

Police-te chuan Deben kut aṭang hian pawisa fai cheng 1,31,000 an man tih sawiin hei hi hel pawl sipai hotu Major Panthoibi hnen aṭanga a dawn niin an sawi bawk.

He thil thleng hi la chhuichian zel a nih avangin police-te chuan thu tam tak erawh an la tarlang duh lo thung.

Imphal West Police SP, Jogeschandra Haobijam chuan thil thleng hi uluk taka an chhuizui thu a sawi.

Manipur police commandos leh 15 Assam Rifles ṭangkawp te chuan Pathianni khan he thubuai kaihhnawihah hian UNLF helpawl mi hmeichhe pakhat an man ve bawk a, an mi man kut aṭang hian cheng 2,31,000 an man thu an sawi bawk.

Police-te chuan an hmeichhe man hi civil body group “Chingmi Tammi Lup” mi a nih thu an sawi.